8 April 2021
Die Nasionale Vervolgingsgesag, oftewel NVG gaan die bestuurder van die motorvoertuig wat in 2017 gebots het met dié van ‘n Pretoria-paartjie, op ’n klag van moord vervolg.
AfriForum se privaatvervolgingseenheid is deur die NVG van dié stap ingelig nadat die 26-jarige Ruan Coen en sy 25-jarige verloofde, Jessika Kennedy op 23 Desember 2017 in ‘n motorongeluk dood is.
Die paartjie, was kort na hulle verlowing op die N4 van Witrivier op pad terug na Pretoria toe die beskuldigde in die teenoorgestelde rigting gery het, beheer oor sy voertuig verloor en met hulle motor gebots het. Albei jongmense is op slag dood.
Die beskuldigde het geringe beserings opgedoen en volgens ooggetuies met polisielede op die toneel geskerts.
Volgens ‘n adviseur by die privaatvervolgingseenheid, Natasha Venter het Coen se ma, Ursula Kors AfriForum genader nadat sy by navraag ingelig is dat die saak se dossier vermis is.
Venter sê die dossier teen die beskuldigde, wat tydens die ongeluk vermoedelik sowel dronk as bedwelmd was, het na bewering by die Silverton-polisiestasie verlore geraak.
Sy sê die beskuldigde moet nou op 29 April vanjaar vir die eerste keer weens dié ongeluk in die Pretoria Landdroshof verskyn.
