9 Februarie 2022
Die trouvenue – wat die afgelope ruk in ‘n stryd met die Menseregtekommissie (MRK) gewikkel was – Beloftebos gaan nié meer troues aanbied nie en wil ook ‘n skikkingsooreenkoms met die kommissie bereik.
Die MRK daag die eienaars van dié venue in Stanford in die Wes-Kaap, Andries en Coia de Villiers voor die hof nadat hulle aangekondig het dat hulle nié paartjies van dieselfde geslag gaan toelaat om daar te trou nie.
In ‘n brief aan die MRK sê die egpaar dat hulle besluit het dat dit tyd is vir ‘n nuwe seisoen vir die plaas en meen die Covid-19-pandemie het ‘n negatiewe uitwerking op die besigheid gehad. Beloftebos het die nuus gehaal nadat hulle glo die paartjie, Sasha Heekes en Megan Watling in Januarie 2020 weggewys het.
De Villiers het aangevoer dat die huweliksbevestiging van paartjies van dieselfde geslag teen hulle geloofsoortuigings gaan. Hulle vra nou in die brief aan die kommissie dat dié kwessie “op ‘n vriendelike wyse opgelos word.”
