26 September 2023
Die ANC het met die EFF kragte saamgesnoer om die Wysigingswetsontwerp op Basiese Onderwys – die sogenaamde Bela-wet – in die parlementêre portefeuljekomitee te aanvaar.
Die DA, VF Plus en die ACDP het daarteen gestem. Die wetsontwerp word nou na die nasionale vergadering verwys vir oorweging.
Een van die omstrede gevolge van dié wet is dat skoolbeheerliggame van hulle magte gestroop sal word om toegangsbeleid te bepaal.
Die VF Plus het in reaksie gesê dat die party reeds verskeie kere dit duidelik gestel het dat hulle gekant is teen die wetsontwerp. Die VF Plus-LP en hoofwoordvoerder oor basiese onderwys, dr Wynand Boshoff meen die vraag wat ontstaan is of die wetsontwerp die reg op selfbeskikking, soos in artikel 235 van die Grondwet vervat, ignoreer.
Hy sê terwyl openbare skole reeds geen keuse ten opsigte van kurrikulum het nie, kon sulke skole wel hul eie aard deur ʼn gedragskode, toelatings- en taalbeleid bepaal. “Hierdie reg word nou in die hande van die provinsiale departementshoof in stede van die skoolbeheerliggaam en ouers geplaas.”
Die volgende stap is dat hierdie wetsontwerp deur die Nasionale Vergadering (NV) oorweeg moet word waarna die nege provinsiale wetgewers dit sal oorweeg.
Daarna moet die Nasionale Raad van Provinsies (NRP) ʼn besluit neem voordat die president dit kan promulgeer. Die wetsontwerp kan egter nog voor daardie tyd gestuit word.
