3 Junie 2022
Die minister van hoër onderwys, Blade Nzimande sê sy departement is besig om ‘n nuwe finansieringsmodel vir universiteite en kolleges saam te stel.
Nzimande het tydens sy departement se begrotingsdebat in die parlement gesê die nuwe plan sal volgende maand aan die kabinet voorgelê word.
Hy sê die regering bly toegewyd daaraan om ‘n werkbare en omvattende finansieringsoplossing te vind om openbare onderwys bekostigbaar te maak.
Volgens die minister is dit veral die sogenaamde vermiste middelklas en nagraadse studente wat sukkel om finansiering van die Nasionale Navorsingstigting te bekom waarvoor daar voorsiening gemaak moet word.
Inligting wat Nzimande voorgelê het wys daarop dat studenteskuld aan tersiëre inrigtings aansienlik gestyg het die afgelope paar jaar.
Volgens geouditeerde state het die opgehoopte bruto studenteskuld aan die einde van Desember 2020 nagenoeg R16,5-miljard beloop.
