17 Januarie 2024
Die Presidensie sê hy het versoek dat die ekonoom, Thabi Leoka (44), die kwessie oor haar kwalifikasies dringend uit die weg ruim.
Sy is in ‘n kwalifikasieskandaal vasgevang nadat Business Day berig het dat sy nie ‘n doktorsgraad aan die London School of Economics behaal het nie.
Leoka – wat in die direksies van genoteerde maatskappye, insluitend MTN, Anglo American Platinum en Remgro, gedien het – hou vol dat sy wel die graad behaal het en voer aan dat dit nie op die universiteit se rekords verskyn nie omdat sy haar van verander het.
President Cyril Ramaphosa het haar in 2019 op sy ekonomiese adviesraad aangestel en ‘n uitgebreide profiel van haar openbaar gemaak.
In reaksie op die dispuut het die presidensie se woordvoerder, Vincent Magwenya, gesê dat die presidensiële adviesraad nie ‘n statutêre liggaam is nie en dat formele keuring nie ‘n vereiste is nie.
