11 Mei 2021
‘n Optog deur sommige begrafnisondernemers na die departement van binnelandse sake se hoofkantoor in Pretoria het geweldadig geraak met van die betogers, wat aanvoer dat hulle ondermyn word.
Die Nasionale Begrafnispraktisynsvereniging van Suid-Afrika eis dat geregistreerde begrafnisondernemings deur die departement toegelaat word om doodsertifikate namens die oorledene se naasbestaandes uit te reik.
Volgens inskrywings op sosiale media moes die polisie van skokgranate gebruik maak om kalmte te herstel.
Johan Rosseau, die voorsitter van die Hervormde begrafnisbedryf-vereniging, oftewel Fira sê die optog en gepaardgaande geweld is onanvaarbaar en meen die publiek asook staatsamptenare is nie veronderstel om deur kleiner groepe – soos die betogers – geïntimideer te word nie.
Hy meen die ondernemers wil nie die wet volg nie en meen hulle optrede het ‘n negatiewe uitwerking op ander wetsgehoorsame begrafnisondernemers, die regering en publiek.
