12 Januarie 2022
Die leier van die amptelik opposisie, John Steenhuisen, het ‘n beroep op president Cyril Ramaphosa se regering gedoen om toe te laat dat die ramptoestand op 15 Januarie verval – eerder as om dit weer te hernu wanneer dit op dié dag verstryk.
Hy sê die ramptoestand is nie meer nodig om die virus te bestuur nie en dat dit meer skade as goed doen.
Volgens hom ondermyn dit boonop die maatskaplike, ekonomiese en demokratiese herstel.
Steenhuisen sê die land het sekerheid nodig en het klem gelê op die noodsaaklikheid van skoliere om voltyds terug te keer skool toe.
Hy sê voorts soek beleggers duidelikheid voordat hulle in ondernemings gaan belê – wat broodnodig is vir ekonomiese groei.
Steenhuisen is van mening dat die nasionale koronavirus-beheerraad ondemokraties is en dat dit ‘n groot risiko vir demokrasie inhou wanneer dit aan ‘n klein groepie individue oorgelaat word om besluite namens die land te neem sonder enige parlementêre oorsig of ander demokratiese toetse.
