23 Junie 2021
Die Johannesburgse Metropolisiediens (JMPD) het met ‘n ondersoek begin nadat ‘n video aan die lig gekom het waarin ‘n vroue straatverkoper glo hardhandig deur metropolisiebeamptes behandel word.
Dié beamptes het glo ook probeer om omkoopgeld van haar te bekom.
Die vrou het hondebeddens in Douglasdale verkoop toe die beamptes haar glo in die motor dwing en haar produkte in beslag neem. In die video kan gehoor word hoe die vrou huil en die beamptes smeek om haar te laat gaan.
Die persoon agter die kamera beweer dat die vrou al vir langer as ‘n jaar hondebeddens op daardie plek verkoop.
Die woordvoerder van die metro-polisie, Wayne Minnaar sê dit is nodig om sekere bywette te handhaaf, maar meen die voorval word ondersoek.
