9 April 2024
Die arbeidshof in Johannesburg het ‘n appèlaansoek van Nedbank se hoof van menslike hulpbronne, Anele Makhosazana Mpungose, van die hand gewys teen haar ontslag – nadat sy “rassisitiese opmerkings” gemaak het.
Sy het beswaar gemaak teen die KVBA se beslissing – waarin bevind is dat die bank regmatig opgetree het om haar te ontslaan – nadat sy onder andere gesê het dat swart mense luier en minder bekwaam is as witmense is en dat hulle nie produktief is nie.
Mpungose was die uitvoerende hoof van dié afdeling sedert haar aanstelling in 2015.
In hofstukke is aangevoer dat sy ook by ‘n geleentheid na twee klaers, Simphiwe Dlamini en Nhlamula Khoza, as idiote verwys het.
Die KVBA het onder andere bevind dat Mpungose by talle geleenthede haar skuldig gemaak het aan oneerbiedige, aanstootlike, vernederende en neerhalende gedrag teenoor ondergeskiktes.
