2 Desember 2022
Die balju wat die landroshof in Eshowe bedien – wat onder meer jurisdiksie oor Nkandla het – het bevestig dat hy ‘n lasbrief ontvang het om op roerende bates van oudpresident Jacob Zuma te gaan beslag lê.
Dit volg nadat die hof die lasbrief uitgereik het in die guns van die likwidateur van VBS Mutual Bank, Anoosh Rooplal.
Die balju het nog nie bevestig wanneer hy die lasbrief gaan uitvoer nie.
‘n Woordvoerder van Rooplal, Louise Brugman, sê die volgende stap sal wees om ‘n inventaris van bates saam te stel voordat daarop beslag gelê word.
Die hooggeregshof in Pietermaritzburg het drie maande gelede reeds ‘n bevel aan VBS toegestaan nadat Zuma in gebreke gebly het om ‘n lening terug te betaal.
Hy skuld volgens hofstukke R6,5-miljoen plus rente.
