14 November 2023
Die seuntjie van Lydenburg in Mpumalanga, wat twee jaar gelede gehospitaliseer is nadat hy ophou asemhaal het, is Maandagaand (13 November) oorlede.
Kort na die voorval is berig dat Ayden Nortje, wat toe ses maande oud was, aan ‘n stukkie biltong gestik het. Dokters het egter later gesê dat hy ‘n toeval gehad het wat sy brein aangetas het.
LEES OOK: BABA AYDEN: “DIT GAAN ELKE DAG BETER”
Hy is toe met brein-hipoksie (suurstoftekort) gediagnoseer.
Hy moes die afgelope twee jaar verskeie kere in die hospitaal opgeneem word, ondermeer weens maagsere, vog op sy longe en probleme met sy lewer, asook sy infeksietelling wat talle kere die hoogte ingeskiet het.
Sy ma, Estelle het op 5 November vanjaar gesê dat Ayden weer weens ‘n infeksie in die hospitaal opgeneem moes word. “Spesialiste van Johannseburg en Pretoria is gekontak oor Ayden se lewer-telling. Die dokters het gesê dat daar niks verder is wat hulle vir Ayden kan doen wanneer dit by sy lewer kom nie.”
LEES OOK: BABA AYDEN WEER TERUG IN HOSPITAAL WEENS INFEKSIE
Sy het ook gesê dat hy nie sterk genoeg is vir ‘n leweroorplanting nie, en sy neurologiese toestand het dit ook nie toegelaat nie.
Estelle het gisteraand op die Facebook-groep, Bid vir baba Ayden bevestig dat hy omstreeks 20:21 oorlede is. “Vanaand het Liewe Jesus sy mooiste engel seuntjie, Ayden kom haal. Ayden het sy engel vlerkies gekry en hardloop nou saam sy Pappa Jesus rond in die Hemel.
Ayden het op 1 November drie jaar oud geword.
