Australië gaan sy grense na verwagting tot diep in 2022 gesluit hou terwyl nóg ʼn vlaag Covid-19-infeksies oor die wêreld spoel.
Die minsiter van handel en toerisme, Dan Tehan sê ʼn vlaag gevalle op die Indiese sub-kontinent wys dat Australië se streng verbod op besoekers steeds nodig is om die land Covid-19-vry te hou.
Australiërs is sedert 20 Maart verlede jaar verbied om oorsee te reis en toegewings aan buitelandse besoekers word moeilik toegestaan.
Voor die pandemie het sowat 1-miljoen korttermynbesoekers Australië elke maand binnegekom. Die syfer het gedaal tot ongeveer 70 000.
Enigiemand wat dié land binnekom – Nieu-Seelanders uitgesluit – moet vir 14 dae lank in streng kwarantyn in ʼn hotel bly.
Australië het altesame net 29 893 gevalle van Covid-19 bevestig sedert die pandemie uitgebreek het. 910 mense is dood en daar is tans slegs 271 aktiewe gevalle.
