22 Junie 2021
‘n Vrou van die Hua Hin-distrik in die westelike deel van Thailand het ‘n buitengewone besoeker by haar huis, in die vroeë oggendure gekry.
Die vrou, Ratchadawan Puengprasoppon het aan CNN vertel dat sy en haar gesin wakker geskrik het weens ‘n geluid in hulle kombuis, waarna hulle die Asiese olifant aangetref het met sy kop wat deur ‘n gat in die kombuis se muur loer.
Volgens haar was die gat reeds daar weens nóg ‘n olifant se “besoek” verlede maand.
Sy sê die nuutste “besoeker” het sy kop deur die gat gesteek en sy slurp gebruik om in die kaste en laaie te grawe.
Thailand se departement van Nasionale Parke, Natuurlewe en Plantbewaring het op hulle Facebook-blad gesê dat die olifant waarskynlik die huis besoek het omdat hy kos vanuit die kombuis geruik het.
Volgens die departement is Puengprasoppon se huis langs die ingang van die nasionale park, waar dié Asiese olifante woon.
