4 Februarie 2022
Die minister van gesondheid, dr. Joe Phaahla het ‘n appélkomitee saamgestel oor die inenting van kinders tussen 12- en 17 jaar oud teen Covid-19.
Dit kom nadat die organisasie, Free The Children Save the Nation appél aangeteken het by die Suid-Afrikaanse Gesondheidsprodukte Regulerende Owerheid, Sahpra oor die inenting van kinders.
Die gesondheidsdepartement het in Oktober verlede jaar die inenting van kinders in die ouderdomsgroep oopgestel. Sahpra het toe die Pfizer-entstof goedgekeur vir die kinders. Die organisasie het in sy appélaansoek aangevoer dat kinders nie so ernstig kan siek word weens die Covid-19-virus nie, wat beteken dat hulle nie ingeënt hoef te word nie.
Die gesondheidsdepartement se woordvoerder, Foster Mohale sê die komitee bestaan uit vyf lede. Die saak sal tussen 11- en 14 Februarie aangehoor word.
