19 April 2021
Die VF Plus het ‘n beroep op inwoners van Noordwes gedoen om enige inligting oor die gesteelde borsbeeld van generaal Koos de la Rey aan te meld om seker te maak die skuldiges ry aan die pen.
Dit kom nadat generaal De la Rey se graf in Lichtenburg die afgelope naweek gevandaliseer en die borsbeeld verwyder is.
Die VF Plus-LP in die nasionale raad van provinsies in Noordwes, Fanie du Toit sê hy en lede van die Federasie van Afrikaanse Kultuurvereniginge, oftewel die FAK het die toneel vandag besoek om die skade aan die graf en monument te evalueer.
Du Toit meen die skending van hierdie kulturele baken van ‘n volksheld beklemtoon opnuut die omvang van die impak wat misdaad op alle terreine van die samelewing het.
Hy sê die feit dat selfs gemeenskappe se kultuurskatte nou deur misdadigers geteiken word, is aanduidend van die vlak van morele en algemene verval wat toenemend beleef word onder die ANC-regering.
