22 Junie 2022
Die regering se regsverteenwoordiger het om uitstel gevra in die saak waarin – onder andere – Solidariteit vra dat die departement van gesondheid die bestaande Covid-19 inperkingsmaatreëls skrap.
In die skrywe wat vanmiddag aan die eisers gestuur is, vra die respondent se regslui om eers teen Vrydag sy antwoordende eedsverklaring by die hof in te dien, aangesien daar moontlik ‘n beduidende aankondiging voor dan gemaak kan word.
Die aankondiging kan – volgens die aansoek om uitstel – ‘n invloed op die verloop van die saak hê.
Dit volg ná ‘n skrywe vroeër vandeesweek waarin Solidariteit eis dat die regulasies teruggetrek word.
Die beweging het ook aangedui indien die regering nie sou toegee aan die eis nie, hy gaan vra vir ‘n strafkostebevel in die hof.
