26 April 2024
Die direksie van Anglo American het die oorname-aanbod van die mynboureus, BHP, eenparig verwerp.
In ‘n verklaring wat vanoggend uitgereik is sê die raad dat die aanbod opportunisties is en die maatskappy onder gewaardeer is.
BHP het nagenoeg R740-miljard vir Anglo aangebied – op voorwaarde dat die onderneming eers van sy Suid-Afrikaanse belange ontslae raak.
BHP stel belang in Anglo se kopermyne in Suid-Amerika, maar nie noodwendig ander bates nie.
In die verklaring sê Anglo se voorsitter, Stuart Chambers, dat Anglo goed geplaas is om aansienlike waarde te skep uit sy portefeulje van hoë kwaliteit bates – wat goed belyn is met die energie-oorgang en ander groot vraagneigings.
Die direksie meen verder dat BHP se voorgestelde struktuur onaantreklik is, wat nie aanklank sal vind by Anglo American se aandeelhouers nie. Die minister van minerale hulpbronne en energie, Gwede Mantashe het gister gesê dat hy nié van so ‘n ooreenkoms ten gunste sal wees nie.
Foto: Australian Mining
