26 April 2023
Die voormalige uitvoerende hoof van Eskom, André de Ruyter, skop vas en weier om die naam van ‘n senior politikus bekend te maak wat volgens hom voordeel getrek het uit grootskaalse korruspie wat by die kragvoorsiener plaasvind.
De Ruyter word deur lede van die staande komitee oor openbare rekeninge, Skoor, ondervra oor bewerings wat hy vroeër vanjaar tydens ‘n televisie-onderhoud gemaak het.
Hy het LP’s na minister van openbare ondernemings, Pravin Gordhan en die veiligheidsadviseur, Sydney Mmufamadi verwys en voer aan dat dit nie in die belang van Skoor se verrigtinge vandag is dat hy die naam bekend maak nie.
De Ruyter het ook gereageer en gesê dat hy op geen stadium gesê het dat dit ‘n minister is wat voordeel uit korrupsie trek nie, maar ‘n senior politikus, en dat hy daarby volstaan.
Hy het aangevoer dat dit die media is wat na die betrokke persoon as ‘n minster verwys het. Volgens hom kan hy nie al sy beweringe staaf nie omdat hy bedank het as uitvoerende hoof en dus nie meer toegang tot sekere dokumente het nie.
De Ruyter het ook weer benadruk dat hy beweerde korrupsie by die owerhede aangemeld het en dat hy vergaderings gehad het met die betrokke rolspelers om korrupsie te bespreek.
Die EFF-LP, Veronica Mente het tydens haar spreekbeurt gesê dat dit nie gepas was om ‘n TV-onderhoud te gebruik as platform vir sy bewerings nie. Volgens haar het De Ruyter sy onderhoud op eTV gebruik om “skinderstories” te versprei.
Volgens De Ruyter is hy bereid om saam met wetstoepassers te werk in hulle ondersoek na die bewerings, maar meen sekere inligting – soos betrokkenes se name – gaan hy ingevolge regsadvies weerhou.
