26 April 2023
Die voormalige uitvoerende hoof van Eskom, André de Ruyter sal vandag virtueel voor die parlement se staande komitee oor openbare rekeninge (Skoor) verskyn.
De Ruyter sal onder meer moet vrae beantwoord oor die bewerings wat hy gemaak het in ‘n onderhoud op eTV vroeër vanjaar. Hy het in dié onderhoud gesê dat kabinetslede betrokke is by die bedrog en korrupsie wat by Eskom gepleeg word.
LEES OOK: DE RUYTER AS HEDENDAAGSE HELD BESKRYF NÁ BEDANKING
Hy het ook gesê dat hy waarskynlik die ware omvang van die diefstal by die kragvoorsiener onderskat toe hy die bedrag op R1-miljard per maand geraam het.
Hy sê ook die interne weerstand teen maatreëls wat hy ingestel het om korrupsie by Eskom te probeer bekamp het sy pogings belemmer.
LEES OOK: ANDRÉ DE RUYTER GEVRA OM VOOR SKOOR TE VERSKYN
Sy opmerkings is vervat in ’n skriftelike voorlegging wat hy vandag aan parlementslede gaan lewer.
Parlementslede beplan om hom uit te vra oor korrupsie, diefstal, wanadministrasie, sabotasie, ’n gebrek aan gevolgebestuur, kartelle en ander finansiële ongerymdhede by Eskom.
