15 Desember 2021
Die ANC het in reaksie op die hofuitspraak oor oud-president Jacob Zuma se mediese parool gesê dat hy nog nie op die nuus gaan reageer nie omdat die departement van korrektiewe dienste nog deur die saak werk.
Dit kom nadat die Noord-Gautengse hooggeregshof in Pretoria vanoggend beslis het dat die voormalige kommissaris van korrektiewe dienste, Arthur Fraser se besluit om Zuma op mediese parool te plaas, onwettig was. Die hof het ook beveel dat Zuma terug tronk toe moet gaan.
LEES OOK: ZUMA BESLISSING: REAKSIE STROOM IN
Die voormalige ANC-lid, Carl Niehaus sê dat die oud-president se inhegtenisname in die eerste plek onwettig was. Hy meen die “aanslag op Zuma is persoonlik.” Hy meen alle Suid-Afrikaners wat in geregtigheid glo moet die beslissing teenstaan en keer dat Zuma weer tronk toe moet gaan.
Die Jacob Zuma-stigting het ook nog nie veel gesê nie maar het wel op sy Twitter-blad ‘n foto gedeel waarin hy meen dat Zuma nooit geweier het om voor die Zondo-kommissie van ondersoek na staatskaping te verskyn nie en dat dit op propaganda neerkom om dit te laat klink asof hy geweier het.
Die oud-president is tot gevangenisstraf gevonnis omdat hy ondanks ‘n hofbevel nié voor die kommissie verskyn het nie.
