9 Maart 2022
Die voormalige minister van maatskaplike ontwikkeling, Bathabile Dlamini is in die Johannesburgse landdroshof skuldig bevind op aanklagte van meineed.
Landdros Betty Khumalo het in haar uitspraak aangevoer dat die staat daarin geslaag het om bo enige redelike twyfel sy saak téén Dlamini te bewys. Die saak hou verband met Dlamini se beweerde rol in die hantering van die Suid-Afrikaanse Agentskap vir Maatskaplike Sekerheid (SASSA) fiasko in 2017.
Die president van die ANC-vroueliga het na bewering vals getuienis onder eed gelewer by ‘n ondersoek wat die Grondwethof in die daaropvolgende jaar ingestel het na die betalingsfiasko by SASSA.
Die hofverrigtinge is egter vanoggend twee keer onderbreek weens opnametoestelle wat onklaar geraak het. Na twee verdagings het tegnici meer tyd gevra om aan die kwessies aandag te gee.
Khumalo het gesê as pogings om die masjiene reg te maak misluk, sal verrigtinge na ‘n ander hofsaal verskuif moet word.
