5 Julie 2022
Die ANC se Nasionale Uitvoerende Komitee (NUK) het gister glo die kragkrisis bespreek, en president Cyril Ramaphosa het partylede probeer oortuig dat daar buite Eskom gekyk moet word om die krisis op te los.
Die minister van openbare ondernemings, Pravin Gordhan het op sy beurt glo gesê dat kenners met meer as 30 jaar se ervaring ingebring moet word om die kragkrisis die hoof te bied.
Hy sê daar is ‘n tekort aan ervaring onder Eskom personeel.
Ramaphosa het glo sy kommer uitgespreek oor die skade wat die kragkrisis die ANC berokken, en sê Suid Afrikaners soek oplossings wat realisties is.
Die VF Plus sê intussen Suid-Afrika se energiekrisis het ontaard in ’n ekonomiese ramp.
Dit volg na gister se aankondiging dat die prys van petrol met R2,57 per liter verhoog is, en diesel met R2,30 per liter.
Die VF Plus se Wynand Boshoff sê daar word van huishoudings en ondernemings, wat toenemend op vloeibare brandstof vir hul energiebehoeftes aangewese is, verwag om brandstofheffings te betaal wat uitsluitlik vir padgebruikers ingestel is.
Boshoff sê die land kan nie langer ‘n ANC regering bekostig nie.
