5 Junie 2024
Die ANC sê hy oorweeg tans ‘n regering van nasionale eenheid.
Die ANC se woordvoerder Mahlengi Bhengu-Motsiri, het vroeër vandag die media toegespreek, na afloop van die party se nasionale werk komitee vergadering gisteraand.
Bhengu-Motsiri sê die ANC het na alle politieke partye uitgereik vir moontlike koalisiegesprekke.
Volgens haar is daar ook na die MK Party uitgereik, maar het die ANC geen reaksie van oud-president Jacob Zuma se party ontvang nie.
Sy sê ook ander partye het nog nie enige voorwaardes gestel vir ‘n moontlike koalisie nie.
Intussen het sommige ANC-lede wat ontevrede is met ‘n moontlike koalisievennootskap met die DA, aangedui dat hulle glo beplan glo om môre by die ANC se vergadering van sy Nasionale Uitvoerende komitee te betoog.
Netwerk24 berig oor ‘n kennisgewing wat glo uitgereik is waarin lede aandui dat hulle nie met die DA in ‘n koalisie wil tree nie. Dit kom na verskeie mediaberigte en sosiale media-veldtogte waarin ‘n koalisievennootskap tussen die DA en die ANC op nasionale vlak glo sterk oorweeg word.
Die lede sê hulle sal daarop aandring dat die ANC nie in ‘n koalisie met die DA tree nie.
Die betoging word glo vir 8 uur môreoggend in Parktown, Johannesburg beplan.
