22 Februarie 2024
“Die DA in die Tswaing-plaaslike munisipaliteit in Noordwes sal nié ’n “luukse belastingbetaler-gefinansierde uitstappie” ter waarde van honderde duisende rande in Hartebeesfontein bywoon nie.
Dit volgens ‘n DA-raadslid in dié munisipaliteit, Soret Viljoen. Sy meen dit is onaanvaarbaar dat die ANC geld kan vind om luukse etes te geniet terwyl Tswaing in erge finansiële nood verkeer.
Die Tswaing-munisipale gebou en die raadsaal kan maklik ’n beleidskonferensie teen ’n fraksie van die koste huisves.
Die munisipaliteit is in Augustus 2021 onder administrasie geplaas, en is toe twee maande voor die plaaslike verkiesing in 2021 deur die minister van samewerkende regering en tradisionele sake, Nkosazana Dlamini Zuma, ontbind.
“Hierdie ingryping het geen positiewe impak gehad nie aangesien die ANC weer aan bewind gekom het net om met hulle stroping voort te gaan.” Sy sê Tswaing word tans deur die provinsiale tesourie ondersteun in ’n poging om die munisipaliteit se finansiële posisie te verbeter.
Sy sê ondanks die finansiële situasie blyk dit steeds of die ANC-regering nie die erns van die situasie verstaan nie en bestee hul geld aan luukse uitstappies terwyl inwoners nie water in hul krane het.
Volgens Viljoen skuld die Tswaing-munisipaliteit Eskom R177 miljoen, en gterstallige pensioenfondsbydraes beloop sowat R100 miljoen. Die munisipale bestuurder, Deon Mere het ook vroeër vandeesweek ‘n kennisgewing uitgereik waarin hy sê dat die munisipaliteit nie Februarie se salarisse sal kan betaal nie.
