19 Maart 2024
‘n Aansoek deur die ANC om die registrasie van die MK-party as onwettig te verklaar word vandag in die verkiesingshof in Bloemfontein aangehoor.
Netwerk24 berig die ANC meen die party se registrasie moet tersyde gestel word, omdat hulle volgens die ANC nie ‘n nuwe aansoek ingevul het nadat die Onafhanklike Verkiesingskommissie (OVK) die oorspronklike aansoek afgekeur het nie.
Die regerende party se regsverteenwoordiger, advokaat Tshidiso Ramogale het tydens vanoggend se verrigtinge gesê dat die aansoek dringend is omdat die algemene verkiesing van 29 Mei om die draai is.
Die MK-party se regsverteenwoordiger, advokaat Dali Mpofu het op sy beurt aangevoer dat die ANC die hofprosesse vermy. Die MK het op 7 September by die OVK geregistreer.
“Die ANC was tevrede met die MK se registrasie as politieke party, maar die oomblik toe oud-president Jacob Zuma in Desember verlede jaar aankondig dat hy die MK gaan ondersteun in vanjaar se verkiesing, het die ANC se gevoel verander.”
Intussen het talle ANC lede buite die hof betoog ter ondersteuning van die party se saak.
Foto: ANC
