28 Oktober 2024
Die ANC het ‘n verpligte grondslagkursus vir politieke onderrig ingestel om sy leiers te bemagtig met kennis van die party se geskiedenis, beginsels en sleuteldoelwitte.
Die president van die party, Cyril Ramaphosa het dié kursus by die afgelope naweek se vergadering van die ANC se Nasionale Uitvoerende komitee in Boksburg bekend gestel.
Hierdie kursus het ten doel om politieke onderrig binne die party te laat herleef as ‘n strategie om die organisasie te vernuwe en te herbou.
Ramaphosa sê die kursus sal verpligtend vir alle ANC-lede wees. Hy het tydens sy toespraak by die NUK-vergadering gesê dat die ANC tans ‘n krisis van gesag en vertroue in die gesig staar, maar meen die ANC sál weer opstaan en sy probleme oorkom.
Hy sê swak dissipline en binnegevegte is van die party se grootste probleme.
