26 Oktober 2022
Die minister van finansies, Enoch Godongwana sal vandag sy mediumtermynbegrotingsrede lewer.
Godongwana sal na verwagting meer sê oor die regering se plan om Eskom se skuld van meer as R400-miljard te verminder.
Die skuldlas is al beskryf as die grootste enkele bedreiging vir Suid-Afrika se ekonomie. Dit kom natuurlik ook te midde van beurtkrag, wat tans ingestel word.
Staatsdienssalarisse, e-tol, en reddingsboeie aan sukkelende staatsondernemings is ander onderwerpe wat Godongwana na verwagting sal aanraak. Die regering beloof al sedert 2019 om ‘n aankondiging oor die omstrede e-tol stelsel te maak, maar daar is nog geen duidelikheid daaroor nie.
Motoriste weier steeds om te betaal vir e-tol, wat beteken die regering moet planne bekend maak oor hoe hulle die snelweg-projek gaan finansier. Van die voorstelle in die verlede was ‘n ekstra heffing op die brandstofprys.
