3 Februarie 2022
Die departement van vervoer sê dit sal ongeveer vier maande neem om die agterstand in die uitreiking en hernuwing van rybewyse op te los.
Die minister van vervoer, Fikile Mbalula het vanoggend tydens ‘n mediakonferensie gesê dat die agterstand in rybewyse wat teen 31 Maart 2022 verval en steeds hernu moet word, op 2,1-miljoen staan.
70% van dié agterstand, of sowat 1,5-miljoen rybewyskaarte het tydens die grasietydperk weens die Covid-19-pandemie verval. Dié grasietydperk geld net vir motoriste wie se lisensies tussen 26 Maart 2020 en 31 Augustus 2021 verval het. Die sogenaamde grasie-rybewyse is net tot 31 Maart vanjaar geldig.
LEES OOK: AGTERSTAND IN LISENSIES VERANDER VERANTWOORDELIKE BURGERS IN KANSVATTERS
Hy sê dit is kommerwekkend dat die grasietydperk oor bietjie meer as ‘n maand verval, maar dit wil voorkom asof mense nie afsprake maak om hulle lisensies te hernu nie. “Slegs 53 mense het die naweek in hulle rybewyse hernu, terwyl 150 motoriste per dag bygestaan kan word.”
Volgens Mbalula is die agterstand vererger nadat die land se enigste rybewys-drukker in November verlede jaar gebreek het. Dit moes na Duitsland gestuur word om herstel te word en het eers verlede maand weer na die land teruggekeer.
