2 Oktober 2024
AfriForum het die DA en VF Plus amptelik versoek om hulle deelname aan die regering van nasionale eenheid (RNE) te heroorweeg sou die klousule in die Bela-wysigingswet – wat die voortbestaan van Afrikaanse skole bedreig – onveranderd geïmplementeer word.
Die uitvoerende hoof van AfriForum, Kallie Kriel sê die organisasie se besluit volg nadat AfriForum intern noodgesprekke gevoer het in reaksie op die feit dat daar, volgens hom, ’n “groep anti-Afrikaanse aktiviste in die ANC, Gautengse regering en selfs polities gedrewe senior amptenare in die Nasionale Departement van Onderwys is wat minagtend optree teenoor president Cyril Ramaphosa se besluit om ’n geleentheid vir verdere beraadslaging oor die Bela-wet se taalklousules te skep.”
LEES OOK: Organisasies, partye het gemengde gevoelens oor die ondertekening van die Bela-wet
Kriel sê hierdie groep wil konstruktiewe gesprekke in die wiele ry en die Bela-wet se implementering in sy huidige formaat deur te stoomroller.
Kriel het daarop gewys dat die hoop dat die RNE ’n nuwe era van samewerking ingelui het, tot niet gemaak sal word indien dit blyk dat die ANC die DA en VF Plus gebruik het om ANC-beleidsrigtings na te volg.
Hy meen sou die Bela-wet ten volle onder die RNE geïmplementeer word, sal almal wat in die RNE dien medepligtig wees aan die Bela-wet se aanslag op die voortbestaan van Afrikaanse gemeenskappe.
