17 April 2024
AfriForum se tak in Parys in die Vrystaat het vanoggend ‘n sogenaamde roudiens vir dienslewering in dié dorp en omliggende gebiede gehou.
Volgens AfriForum is die Ngwathe Plaaslike Munisipaliteit een van die vele munisipaliteite in die land wat gebuk gaan onder swak dienslewering.
AfriForum se distrikskoördineerder vir die Mooirivier, Alta Pretorius sê die organisasie het talle pogings aangewend om afsprake met die burgemeester en waarnemende munisipale bestuurder te maak om swak dienslewering te bespreek, en wou selfs hulle hulp aanbied.
Sy sê in reaksie op die mislukte pogings om die munisipale amptenare toe te spreek het hulle ’n swart “doodskis”, wat die verval in die dorp simboliseer, na die munisipale gebou geneem.
“Ons het vandag dienslewering begrawe aangesien daar nie meer skoon, lopende water, elektrisiteit of ordentlike paaie in dié dorp is nie. Die Vaalrivier is ook vol riool, die rioolwerke laat veel te wense en selfs die kanale wat vir besproeiing gebruik moet word is vol riool.”
Sy sê hulle het ook geëis dat die waarnemende direkteur van tegniese dienste, Mokete Phele sy bedankingsbrief moet indien. Phele het in Februarie verlede jaar gesê dat hy sal bedank as die inwoners van dié munisipaliteit nie binne ses maande water het nie. “Ons het byvoorbaat ’n bedankingsbrief teen sy kantoordeur opgesit.”
Pretorius sê dit is jammer dat hulle eers hierdie demonstrasie moes doen voordat hulle reaksie van die munisipaliteit gekry het.
Na afloop van die demonstrasie het lede van die Parys-tak gewys dat hulle nie net hande gevou sal sit en wag vir die munisipaliteit om hulle pligte na te kom nie, hulle sal self inisiatief neem. Stoptekens is opgerig by gevaarlike kruisings en randstene is in die hoofstraat geverf om dit netjies te laat vertoon.
