16 Augustus 2022
Die AfriForum-buurtwag in Germiston aan die Oos-Rand van Gauteng was op 12 Augustus met hul snuffelhond, Storm, op patrollie toe sy versteekte smokkelware uitgesnuffel het.
Storm is spesifiek opgelei om dwelmmiddels uit te snuffel. AfriForum se woordvoerder van gemeenskapsveiligheid, Jacques Broodryk sê tydens ’n blaaskans het die span ’n winkel by ’n plaaslike vulstasie binnegegaan om verversings te koop, toe Storm aan haar hanteerder aangedui het dat twee klante in die winkel smokkelware wegsteek.
By nadere ondersoek is gevind dat die verdagtes in besit was van ’n ongelisensieerde vuurwapen, sowel as dwelms.
“Een van die verdagtes het van die toneel gevlug en is deur buurtwaglede agternagesit, maar het daarin geslaag om te ontsnap. Die ander verdagte is aan die SAPD oorhandig en aangekla vir die besit van dwelms en ’n ongelisensieerde vuurwapen,” sê Broodryk.
Hy meen snuffelhonde speel ’n belangrike rol om patrolleerders se vermoëns te versterk om verdagtes betyds te identifiseer en vas te trek.
