25 Oktober 2022
Die burgerregteorganisasie, AfriForum het vandag tydens ’n mediakonferensie ’n veldtog geloods teen die onteieningswetsontwerp wat, volgens hulle, privaateiendomsreg bedreig.
AfriForum sê hierdie veldtog het ’n plaaslike, nasionale en internasionale komponent.
Nasionaal behels hierdie veldtog ’n manifes, wat die onteieningswetsontwerp teenstaan, en onderteken is deur 13 burgerregte-, landbou-, politieke- en ander organisasies van regoor die land.
AfriForum se veldtogbeampte vir strategie en inhoud, Ernst van Zyl sê die organisasie se regspan het ook vandag ’n brief aan president Cyril Ramaphosa geskryf. Hierdie brief lig die onteieningswetsontwerp se ongrondwetlikheid en gevare uit en op daardie basis versoek dit die president om die wetsontwerp terug te verwys na die wetgewer en dat dit vooraf na die Konstitusionele Hof verwys word.
Hy sê AfriForum gaan op plaaslike vlak sy takke mobiliseer om die manifes aan hul provinsiale regerings te oorhandig. “As deel van die internasionale komponent van hierdie veldtog, gaan AfriForum briewe rig aan die ambassades in die land. In hierdie briewe versoek AfriForum dat hierdie ambassades hul tuislande in kennis sal stel van die nuutste bedreiging van privaateiendomsreg in Suid-Afrika.”
Hy sê die organisasie beplan ook om die uitgebreide netwerk van kontakte wat die organisasie oor die jare in die buiteland opgebou het, in te lig oor die gevare van die onteieningswetsontwerp.
“Ons kan nie toelaat dat die regering die mag kry om enige eiendom wat hulle wil net te gryp nie.”
