15 November 2022
AfriForum Jeug het vandag vrae aan UNISA gestel om te bepaal watter stappe UNISA al gedoen het – of gaan doen – om akademiese oneerlikheid by die instelling stop te sit.
Dit volg nadat AfriForum Jeug deur ’n student genader is oor verdagte teksboodskappe wat UNISA-studente ontvang waarin regstreekse eksamenhulp en ’n waarborg van 90% of hoër uitslae, teen betaling, aangebied word.
Die jeugorganisasie het ’n video en ’n brief aan UNISA gestuur waarin vermoedelike akademiese ongerymdhede by dié instelling ontbloot word.
‘n Woordvoerder van die beweging, René van der Vyver sê hulle is verder besorg oor moontlike oortredings van die POPI-wetgewing aangesien die bron van die verdagte boodskappe telkens geweet het vir watter vakke die betrokke student geregistreer is en wat die datums is waarop sy eksamens plaasvind.
