7 November 2023
AfriForum Jeug het nóg ‘n skrywe aan die Universiteit van Pretoria (UP) gerig waarin hulle vir antwoorde vra nadat dit bekendgemaak is dat die UP die klagtes teen die EFF Student Command van die UP (EFFSC UP) -kandidate teruggetrek het en ’n tydelike studentekomitee gaan aanwys.
Dit kom nadat die universiteit se verkiesing van sy studenteraad (SR) vroeër vanjaar in omstredenheid gedompel was nadat al agt posisies van die SR deur lede van die EFF se jeugorganisasie beset is.
AfriForum Jeug sê hy wil by die UP weet watter proses gevolg is om die klagtes teen die EFFSC UP-kandidate terug te trek, en hoe dit hul geskiktheid om op die studenteraad (SR) te dien, beïnvloed.
Die organisasie se woordvoerder, René van der Vyver sê hul wil ook by die UP weet of dié EFF-lede op 2024 se SR sal mag dien.
“Prof. Themba Mosia, visekanselier van die UP, het in ’n skrywe gesê dat die tydelike studentekomitee op 30 November aangekondig gaan word maar daar is nie duidelikheid oor hoe en wanneer die finale SR vir 2024 verkies en aangekondig gaan word nie.”
