4 Maart 2024
Die burgerregteorganisasie, AfriForum en die Tshwane-metro het vanoggend ‘n vyfjaarmemorandum van samewerking en verstandhouding onderteken.
Die memorandum moedig op ‘n amptelike wyse wedersydse steun en gemeenskapsbetrokkenheid aan.
Die memorandum is vanoggend in ‘n openbare park in Valhalla deur die burgemeester in die Tshwane-metro, Cilliers Brink en die uitvoerende hoof van AfriForum, Kallie Kriel onderteken nadat hulle beide die park se gras gesny het.
Met die ondertekening van die memorandum kom AfriForum en die Tshwane-metro onder meer ooreen om, in die gees van samewerkende regering en ontwikkeling, uitdagings ten opsigte van beveiliging en beskerming van eiendom en die omgewing in die stad se gemeenskappe te takel.
Brink sê hierdie memorandum van verstandhouding sal nou ons gewaardeerde verhouding formaliseer en help om ons werksverhoudinge voortaan te verbeter.
Dienste en projekte wat deel vorm van die fokus van die betrokke partye se samewerking sluit onder meer in:
- die bevordering van gemeenskapsgebaseerde vullisverwyderings- en skoonmaakaksies
- grassnyprojekte
- verwydering van indringerplantspesies
- die identifisering van onwettige stortingsterreine
- gemeenskapsveiligheidsinisiatiewe
- verhoogde sigbaarheid, monitering en aanmelding van verdagte aktiwiteite aan die munisipaliteit
- bystand ten opsigte van die ontmoediging van grondbesetting
Volgens Kriel is die memorandum wat vandag met die Tshwane-metro onderteken is, ’n belangrike stap in AfriForum se strewe na die afwenteling van mag na gemeenskapsvlak en die vestiging van gemeenskapsgebaseerde federalisme.
