24 Junie 2021
Die geskorste ANC sekretaris-generaal, Ace Magashule se hofsaak oor sy tydelike skorsing het vanoggend in die Suid-Gautengse hooggeregshof in Johannesburg begin.
Dit word aanlyn deur ‘n volbank regters aangehoor.
Magashule se regsverteenwoordiger, advokaat Dali Mpofu sê hofstukke, wat laat ingedien is, is “arrogant”. Hy het verwys na die ANC en die party se adjunk sekretaris-generaal, Jessie Duarte, “wat die spertyd van 20 Mei geïgnoreer het.” Hulle hofstukke is eers op 25 Mei ingedien.
Volgens Mpofu is dit egter veel erger dat president Cyril Ramaphosa – wat die eerste respondent in die saak is – se hofstukke eers op 27 Mei ingedien is.
Hy meen ‘n sterk boodskap moet gerig word dat hierdie gedrag onaanvaarbaar is omdat die hof en sy prosedures gerespekteer moet word.
