26 Oktober 2023
Adjunkpresident Paul Mashatile het ‘n huis in die Waterfall-landgoed – ter waarde van R37-miljoen as sy eie eiendom verklaar, terwyl dit op ‘n maatskappy se naam geregistreer is wat aan sy seun, Thabiso Mashatile, en sy skoonseun, Nceba Nonkwelo, behoort.
Die nuusdiens, News24, het voorheen berig dat Mashatile en sy vrou, Humile Mjongile, kort na sy inhuldiging as ‘n Lid van die Parlement in Maart in dié luukse eiendom ingetrek het.
Sy woordvoerder, Vukani Mde, sê dat die skuif op daardie tydstip die gevolg was van ernstige dreigemente teen Mashatile en sy gesin se veiligheid deur ‘n vorige vriendin, Gugu Nkosi.
Nonkwelo het voorheen minstens vier lenings van ‘n Gauteng-regeringsbehuisingsmaatskappy, die Gauteng Vennootskapsfonds, ontvang vir die ontwikkeling van studente-akkommodasie in Highlands, Johannesburg.
Meer as ‘n dekade later bly die eiendom onontwikkel, terwyl ‘n ander maatskappy wat deur Nonkwelo besit word, die lening aan Legacy Properties verskaf het, waarvan hy en Mashatile Jr direkteurs is, om die Waterfall-huis aan te koop
Mashatile het verder ook sy huis in Kelvin, in Sandton verklaar. Hy het verder eksklusiewe gebruik van die OR Tambo Huis, asook ‘n groot eiendom in die Bryntirion estate in Pretoria.
