18 Augustus 2022
ActionSA sê hy is steeds toegewyd tot die koalisie ooreenkoms in die Tshwane metro, maar wil nie langer saam met die burgemeester Randall Williams werk nie.
Die party het vandag die media toegespreek oor die weg vorentoe, na die spesiale raadsitting vroeer die week waartydens hulle nie ’n voorstel gesteun het, om ’n voorstel vir onafhanklike kragopwekking in die stad vir ’n openbare deelname proses te stuur nie.
ActionSA is van mening dat burgemeester Williams ingemeng het met die tenderproses van die stad, om ’n nie-kompeterende bod van die Kratos Konsortium goed te keur.
LEES OOK: SPANNING HEERS IN TSHWANE-METRO SE KOALISIEREGERING
Die party se nasionale voorsitter Michael Beaumont sê om in ’n koalisie te wees, beteken nie hulle hoef die DA se besluite blindelings goed te keur nie.
Intussen het die DA se nasionale woordvoerder, Cilliers Brink in reaksie hierop gesê dat al die koalisievennote in die Tshwane-Metro, met die uitsondering van ActionSA, tevrede was met die verslag wat gister in die raad gedien het.
Brink sê verder dat indien die verslag gister goedgekeur is sou `n openbare proses gevolg het waartydens besware geopper kon word.
Volgens Brink bly die DA verbind tot die koalisieregering maar dat ActionSA moet herbesin oor hulle rol in die koalisieregering.
