16 Maart 2023
ActionSA het vandag klagte aanhangig gemaak teen twee individue wat probeer het om sy raadslid in die Tshwane metro, Kgosietsile Kgosiemang, om te koop.
Kgosiemang was deur die twee individue genader tydens die spesiale raadsvergadering waartydens Murunwa Makwarela as burgemesteer verkies is.
Die twee was glo in kontak met ’n raadslid van die Defenders of the People (DOP) party in die Tshwane metro.
Hulle het aan Kgosiemang gesê dat hulle hom sy salaris as burgemeesterskomiteelid sal aanbied vir die res van die termyn, sou hy vir Makwarela stem.
Kgosiemang het die aanbod van die hand gewys.
Die klagte teen die twee individue is vandag by die Olievenhoutbosch polisiestasie in Centurion ingedien.
ActionSA se nasionale voorsitter, Michael Beaumont sê dit is ook hoogs onwaarskynlik dat ’n party soos DOP op sy eie opgetree het.
“Ek dink nie DOP het 2 miljoen Rand tot sy beskikking om raadslede om te koop nie” het Beaumont gesê.
“Daar is meer as een politieke party by hierdie staatsgreep betrokke in die Tshwane metro. Een van die vrae wat ons moet vra is: Wat is die ANC en die EFF se betrokkenheid in hierdie gevalle van omkopery?”
Beaumont voeg by dat Kgosiemang nie noodwendig die enigste raadslid is wat met beloftes van omkoopgeld genader is nie.
Agt raadslede van die veelpartykoalisie het tydens die verkiesing eerder vir Makwarela gestem as vir die veelparty koalisie se kandidaat, Cilliers Brink.
“Ons is nog besig met ons ondersoeke om vas te stel of enige ander raadslid omkoopgeld aanvaar het. Kgosiemang het die regte ding gedoen en nie die omkoopgeld aanvaar nie, maar ons weet daar is ander raadslede wat die geld aanvaar het en nou stil bly” het Beaumont gesê.
