20 Mei 2021
Die leier van Action SA, Herman Mashaba het vanoggend tydens ‘n mediakonferensie bevestig dat hy homself verkiesbaar gaan stel as burgemeester van die Johannesburg-metro in vanjaar se munisipale verkiesing, wat op 27 Oktober plaasvind.
Mashaba, wat voorheen by die DA betrokke was, is in 2016 as Johannesburg se burgemeester verkies. Hy het in Oktober 2019 uit die party en as burgemeester bedank.
Action SA is in Augustus verlede jaar op die been gebring en is in Desember by die Onafhanklike Verkiesingskommissie geregistreer om aan die komende verkiesing deel te neem.
Mashaba het tydens die konferensie gesê dat hy aanvanklik nie beplan het om homself verkiesbaar te stel nie, maar het weens verskeie versoeke van Johannesburg-inwoners wél die besluit geneem om homself verkiesbaar te stel.
Hy sê dit is belangrik om te weet dat hy nie outomaties Action SA se burgemeesterskandidaat word vir die party nie, maar dat hy ook deur ‘n sogenaamde keuringsproses sal gaan.
Mashaba het benadruk dat indien dit goed gaan in Johannesburg sal dit ook goed gaan in die res van die land.
