Ace Magashule se skorsing “nié onwettig nie”

9 Julie 2021

Die geskorste ANC sekretaris-generaal, Ace Magashule bly geskors nadat die Suid-Gautengse hooggeregshof in Johannesburg sy aansoek om sy skorsing ter syde te stel – van die hand gewys het.

Magashule is geskors nadat die ANC se nasionale uitvoerende komitee vroeër vanjaar besluit het dat party lede, wat van ernstige misdade aangekla word, opsy moet staan totdat die strafregtelike saak teen hulle afgehandel is.

Magashule het in reaksie op sy skorsing toe probeer om vir president Cyril Ramaphosa te skors. Hierdie “skorsingsbrief” is egter ook vanoggend ter syde gestel.

Hy het in sy aansoek aangevoer dat die skorsing sy regte tot gelykheid en menswaardigheid skend. Die hof het egter bevind dat die ANC se Grondwet strook met Suid-Afrika se Grondwet en dat die ANC dit nie aangepas het om “teen Magashule te diskrimineer nie.”