5 Mei 2021
Die ANC se sekretaris-generaal, Ace Magashule is tydelik uit die party geskors en mag gedurende sy skorsing geen van sy pligte nakom nie.
In ‘n skorsingbrief, wat deur die adjunk-sekretaris-generaal, Jessie Duarte op 3 Mei aan Magashule gestuur is, word hy aangesê dat hy ook nie die ANC in die openbaar of op enige ander plaforms mag verteenwoordig nie.
Magashule mag luidens dié skorsingsbrief hom ook nie uitlaat oor enige ANC-aangeleenthede nie.
Volgens die brief sal Magashule egter steeds sy salaris en alle ampsvoordele ontvang.
Die skorsing kom nadat die ANC se werkkomitee Maandag gesê het dat alle lede, wat hulself aan korrupsie of ander ernstige misdade skuldig maak en nie vrywillig opsy staan nie, skorsingsbriewe moet ontvang.
Die betrokke lede het die geleentheid gekry om self binne 30 dae opsy te staan of om geskors te word. Magashule het egter versuim om dié spertyd na te kom.
Volgens die brief sal Magashule die ANC maandeliks op die hoogte moet hou oor die vordering van sy hofsaak. Die ANC sal ook sy tydelike skorsing elke ses maande hersien.
Magashule is tans uit op borgtog van R200 000 vir die aanklagte van bedrog, korrupsie en geldwassery wat hy in die gesig staar. Dié aanklagte hou verband met die omstrede Vrystaatse asbesdak-ouditprojek in die tyd wat hy die premier van die provinsie was.
