10 November 2022
Altesaam 83% van die skoolverlaters wat aan Solidariteit se Skoolverlatersverslag deelgeneem het, wil verder studeer ná skool.
Tog weet bykans ʼn derde van hulle nie waar die geld daarvoor vandaan gaan kom nie. Solidariteit Jeug, in samewerking met die Solidariteit Navorsingsinstituut (SNI), het vandag sy jaarlikse Skoolverlatersverslag bekendgestel.
Die verslag dui op gemengde welslae vir 2022 se skoolverlaters met duidelike uitdagings, soos die impak van die Covid-19-pandemie, aan die een kant maar ook met verskeie bemoedigende resultate oor hul toekomsplanne aan die ander kant.
Navorsing vir hierdie verslag het deur die loop van die jaar onder duisende matrikulante in 13 skole plaasgevind.
Die beleidsontleder en navorser by die SNI, Johnell van Vollenhoven sê dit is bemoedigend om te sien dat bykans twee derdes van die respondente positief voel oor Afrikaans as onderrigtaal. “As die jeug ingekoop is in ons taal en kultuur lyk die toekoms reeds blink. Wat bydra tot die bemoedigende gevoel is dat meer as 80% van die matrikulante van plan is om verder te studeer.”
Van Vollenhoven sê meer as 30% van respondente het aangedui dat die Covid-19-pandemie hulle negatief beïnvloed het met sommige wat verwys het na ouers wat hul werk verloor het, gevoelens van depressie en eensaamheid sowel as ʼn ernstige afname in motivering.
Sy sê 90% van skoolverlaters wat verder gaan studeer wil dit in Suid-Afrika doen, en meen dit is uiters positief.
