1 Julie 2022
Tussen April 2021 en Maart 2022 het 90 000 meisies in Suid-Afrika tussen die ouderdom van 10- en 19 jaar oud swanger geraak.
Die minister van basiese onderwys, Angie Motshekga het dié inligting vandeesweek in reaksie op ‘n parlementêre vraag bekend gemaak. Die meeste tienerswangerskappe is in KwaZulu-Natal aangemeld met 24 230 meisies wat in hierdie tydperk in die provinsie swanger geraak het.
So lyk die ander provinsies tov. tienerswangerskappe tussen April 2021 en Maart 2022:
- Gauteng – 13 814
- Mpumalanga – 8 840
- Oos-Kaap – 12 582
- Wes-Kaap – 6 543
- Noord-Kaap – 2 662
- Vrystaat – 4 444
- Limpopo – 11 287
- Noordwes – 2 66
Dié syfers deur Motshekga is egter minder as die data wat ongeveer drie maande gelede deur Statistiek Suid-Afrika bekend gemaak is. Die SSA het in Maart gesê dat 106 383 geboortes by die departement van binnelandse sake geregistreer is aan moeders tussen 10- en 19 jaar oud in 2019.
Motshekga het tydens die vraag en antwoord-sessie in die parlement gesê dat swanger tieners toegang in skole moet hê tot die nodige ondersteuning, berading en mediese sorg.
