25 November 2022
‘n Graad 3-leerling (9) aan die Dr Yusuf Dadoo Laerskool is dood na ‘n busongeluk gisteroggend in Azaadville aan die Wes-Rand.
Die LUR vir onderwys in Gauteng, Matome Chiloane sê in ‘n verklaring dat die departement met skok verneem het van die ongeluk waarin ‘n bus van ‘n privaat skoolvervoer-maatskappy betrokke was. Kinders van laer- en hoërskole in die omgewing was ten tyde van die ongeluk in die voertuig.
Volgens Chiloane is die seun aanvanklik ernstig beseer en per helikopter na ‘n nabye hospitaal geneem, waar hy later dood verklaar is.
Twee leerlinge is kritiek beseer en word steeds in ‘n hospitaal behandel. Die woordvoerder van die departement, Steve Mabona sê die oorsaak van die ongeluk word ondersoek. “Die leerlinge en personeel van beide skole ontvang berading.”
