30 Junie 2023
‘n 9-jarige meisie is in ‘n motorongeluk dood toe ‘n motorboot se skroef deur die motor se voorruit gebreek en haar teen die kop getref het.
Die insittendes van die twee motors wat Woensdagmiddag (28 Junie) by die botsing naby Touwsrivier betrokke was, was lede van een gesin.
Volgens die polisiewoordvoerder, kaptein Frederick van Wyk was die pa in die voorste voertuig wat ‘n boot gesleep het en die ma en die oorledene was in die voertuig direk agter hom.
Die voorste voertuig het by padwerke stilgehou waarna die agterste voertuig teen die boot vasgery het. Die kind is na ‘n hospitaal geneem, maar het aan haar wonde beswyk.
Die gesin is van Pretoria afkomstig, en was glo na Kaapstad op pad. ‘n Saak van strafbare manslag word ondersoek.
Foto: Ismail’s Towing
