1 Junie 2021
Die Gautengse polisiekommissaris, luitenant-generaal Elias Mawela, het verlede Vrydag tydens ‘n komiteevergadering van die provinsiale gemeenskapveiligheidskomitee, op ʼn vraag van die VF Plus erken dat 84 polisievuurwapens vanaf Januarie tot Maart vanjaar as gesteel aangemeld is.
Die VF Plus se lid van die provinsiale wetgewer, Kobus Hoffman sê hy is bekommerd oor die groot aantal gesteelde wapens aangesien dit nou in die hande van kriminele is.
Hy sê ook elke saak moet deeglik ondersoek word aangesien elke beampte in beheer van daardie wapen bevoeg verklaar is om die wapen te hanteer en veilig te berg.
Mawela is ook gevra om meer inligting te verskaf oor watter tipe vuurwapens gesteel is, hoeveel ammunisie weg is en by watter polisiestasies dit gebeur het.
Volgens Hoffman het Mawela ook Vrydag bevestig dat moord in Gauteng van Januarie tot Maart met 3,9% toegeneem het en poging tot moord met 5%.
Seksuele misdrywe het ook die afgelope kwartaal met 0,9% gestyg. In dieselfde tydperk verlede jaar is 2602 sake aangemeld en vanjaar 2625 wat ‘n styging van 23 gevalle toon.
