17 Julie 2023
Die gewilde sepie, 7de Laan groet na 23 jaar op die kassie.
Die sepie het in ‘n verklaring op sy Facebook-blad gesê dat die SAUK die besluit geneem het om die sepie te beëindig na seisoen 24 in Desember vanjaar. Die woordvoerder, Caroline Phalakatshela het die aanhangers bedank vir hulle ondersteuning die afgelope 23 jaar.
Danie Odendaal se sepie, wat afspeel in Hillside het sy debuut op 4 April 2000 op SABC 2 gemaak, en gou het kykers lief geraak vir karakters soos Oubaas, Hilda, Charmaine, Aggie, Bart, en Emma.
Phalakatshela sê aanvanklik was 7de Laan net in Afrikaans beskikbaar, maar het intussen uitgebrei om meer inklusief te wees.
Die hoof van video-inhoud by die SAUK, Lala Tuku sê dit was ‘n groot voorreg vir die openbare uitsaaier om die afgelope paar jaar saam met Danie Odendaal en die span te werk.
