12 Januarie 2022
Die LUR vir onderwys in Gauteng, Panyaza Lesufi sê 700 leerlinge in die provinsie is steeds nie in skole geplaas nie – dit terwyl duisende leerlinge vandag skool toe is om hulle 2022 skooljaar te begin.
Hy het vanoggend tydens ‘n skoolbesoek namens die departement om verskoning gevra vir die ouers wie se kinders nie vanoggend met hul skoolloopbaan kon begin nie. Lesufi sê dié kinders sal teen die einde van die maand geplaas word.
Hy meen dit is nié weens ‘n tekort aan skole dat leerlinge nie geplaas nie. Volgens hom verkies ouers sommige skole bo ander en meen dit is buite die departement se beheer.
Verskeie departemente in die Gautengse plaaslike regering het ook vandag skole besoek om te sien hoe die eerste dag verloop. Die premier van Gauteng, David Makhura het vanoggend die Setlabotjha Laerskool in Emfuleni besoek waar veranderinge aan die waghuisie en biblioteek aangebring is terwyl nuwe klasse ook gebou is.
Lesufi meen hulle sal verseker dat geen kind agterraak nie.
