1 September 2022
‘n Honde-eienaar het ‘n storm op sosiale media veroorsaak nadat dit aan die lig gekom het dat hy meer as £5,000 of byna R100 000 betaal het om sy hond se tande te laat skoonmaak.
Volgens die Britse koerant, spandeer Britse honde-eienaars gemiddeld tussen £4,600 en £30,800 aan hulle diere in hulle leeftyd.
Die betrokke eienaar is op die sosiale media-platform, Reddit veroordeel nadat hy gekla het oor sy skoonfamilie wat woedend is vir hom oor dié duur tandartsafspraak. Die man sê sy 12 jaar oue hond moes onder narkose gaan vir die prosedure om sy tande skoon te maak.
Hy meen dit was nie vir hom ‘n probleem om sóveel vir die tandarts te betaal nie omdat “hy seker wil maak dat sy troeteldier gesond en versorg is.”
Volgens hom is hy en sy vrou nie ryk nie en is £5,000 ‘n hele paar maande se salaris. Van die kommentare het die man bedank vir sy opoffering om vir sy troeteldier te sorg, maar sommige mense reken ook dat hy die slagoffer van ‘n slenter was.
